পৰ্যালোচনা

দা জাপানীজ ৱাইফ

দা জাপানীজ ৱাইফ (The Japanese Wife)

পৰিচালকঃ অপৰ্ণা সেন

উপলব্ধ প্লেটফৰ্মঃ এম এক্স প্লেয়াৰ (MX Player)

‘দা জাপানীজ ৱাইফ’ ২০১০ চনত মুক্তি লাভ কৰা এখন বাংলা চিনেমা৷ চিনেমাখনৰ পৰিচালক অপৰ্ণা সেন৷ অপৰ্ণা সেনক নতুনকৈ পাঠকৰ আগত চিনাকি কৰাই দিয়াৰ প্ৰয়োজন নাই৷ সকলো স্তৰৰ চিনেমাপ্ৰেমীকে অপৰ্ণা সেনৰ চিনেমাই চিন্তাৰ খোৰাক দিছে৷ কিন্তু তেওঁৰ আনবোৰ চিনেমাতকৈ ‘দা জাপানীজ ৱাইফ’ৰ কাহিনী, ট্ৰিটমেন্ট কিছু পৃথক৷ লেখক কুনাল বসুৱে লিখা একে নামৰ প্লেটনিক বা অধিবাস্তৱ কাহিনী এটাক চিনেমাৰ ৰূপ দিয়া হৈছে৷ পশ্চিমবংগৰ সুন্দৰবন নিবাসী স্কুল মাষ্টৰ স্নেহময় আৰু জাপানী যুৱতী মিয়াগীৰ এক বিষাদময় আৰু পবিত্ৰ প্ৰেম গাঁথাৰ ভেটিত নিৰ্মিত হৈছে ‘দা জাপানীজ ৱাইফ’৷ শাৰীৰিক দূৰত্ব প্ৰেমত বাধা নহয় অথবা প্ৰেমত শৰীৰৰ প্ৰয়োজন নাই , এই  কথা চিনেমাখনত পৰিচালকে খুব সুন্দৰকৈ উপস্থাপন কৰিছে৷ হাজাৰ হাজাৰ মাইল দূৰৈত থকা মিয়াগীৰ লগত পত্ৰবন্ধুত্ব আৰু পিছত প্ৰেমৰ সম্পৰ্ক গঢ়ি উঠে স্নেহময়ৰ৷ এই প্ৰেমত নাই আশা প্ৰতিদানৰ, জৈৱিক মিলনৰ৷ কেৱল শক্তিশালী মানসিক সম্পৰ্কৰে গঢ়ি উঠা এনে প্ৰেম বাস্তৱ জীৱনত কিমানদূৰ সম্ভৱ সেই কথাই দৰ্শকৰ মনত নিশ্চয় প্ৰশ্নৰ উদয় কৰাব৷ মিয়াগী তেওঁৰ বৃদ্ধ, ৰুগীয়া মাতৃৰ সৈতে জাপানৰ এখন সৰু চহৰত থাকে৷ পিতৃ-মাতৃহীন স্নেহময়ক সৰুৰে পৰা ডাঙৰ কৰিছে মাহীয়েকে৷ পত্ৰ আদান-প্ৰদানৰ মাজেৰেই দুয়োৰে মাজত প্ৰেম আৰু তাৰ পৰিণতিত বিবাহ সম্পন্ন হয়৷ মিয়াগীয়ে প্ৰতিশ্ৰুতি দিছিল যে মাতৃৰ দায়িত্বৰ পৰা আজৰি হ’লে তেওঁ স্নেহময়ৰ ওচৰলৈ আহিব৷ ইতিমধ্যে স্নেহময়ৰ ঘৰত আহি থাকিবলৈ লৈছিল কণমানি পুত্ৰসহ মাহীয়েকৰ সম্পৰ্কীয় এগৰাকী বিধৱা যুৱতী৷ মাহীয়েকে আশা কৰিছিল কম বয়সতে বৈধব্যক আঁকোৱালি ল’বলগীয়া হোৱা সন্ধ্যাক স্নেহময়ে বিয়া কৰাই স্ত্ৰীৰ মৰ্যাদা দিব৷ কিন্তু স্নেহময়ে সেয়া কৰিব নোৱাৰিলে৷ কোনো দিন লগ নোপোৱা, কেৱল পত্ৰ বিনিময়েৰে অদৃশ্য বন্ধনত বান্ধ খাই পৰা মিয়াগীক ইতিমধ্যে স্ত্ৰীৰ মৰ্যাদা দিছে স্নেহময়ে৷ তেওঁৰ চিনাকি সকলো লোককে জনাইছে তেওঁৰ জাপানী পত্নীৰ কথা৷ মিয়াগীয়েও মনে-প্ৰাণে স্নেহময়কে স্বামী হিচাপে বাৰণ কৰিছে৷ মাতৃৰ মৃত্যুৰ পাছত মিয়াগী কেঞ্চাৰত আক্ৰান্ত হ’ল৷ হাজাৰ মাইল দূৰৈৰ পৰাই স্নেহময়ে আপ্ৰাণ চেষ্টা চলালে মিয়াগীক সুস্থ কৰি তুলিবলৈ৷ ছমাহৰ কাৰণে স্কুলৰ পৰা ছুটি লৈ কবিৰাজ, হমিঅ’পেথী, এলপেথীক চিকিৎসকৰ ওচৰ চাপিলে৷ ৰোগীক নেদেখাকৈয়ে ৰোগৰ বৰ্ণনা শুনি চিকিৎসকে দিয়া ঔষধ মিয়াগীয়ে নিষ্ঠাৰে গ্ৰহণ কৰিছে৷ মিয়াগী সুস্থ হৈ উঠিল৷ কিন্তু স্নেহময় নিম’নিয়াত আক্ৰান্ত হৈ মৃত্যু হ’ল৷ হিন্দু ব্ৰাহ্মণ বিধৱাৰ নিয়ম অনুসৰি মিয়াগীয়ে চুলি খুৰাই বগা সাজ পৰিধান কৰি অৱশেষত স্নেহময়ৰ ঘৰত উপস্থিত হয়৷

কাহিনীৰ সমাপ্তি ট্ৰেজিক আৰু অন্তৰস্পৰ্শী৷ কৰুণ ছবি এখন দৰ্শকৰ মনত ভাঁহি উঠে৷ লগতে এটা প্ৰশ্ন-এনে প্ৰেম জানো সম্ভৱ? য’ত স্নেহময়ৰ স্বাৰ্থহীনতা আৰু মিয়াগীৰ গভীৰ নিষ্ঠা দেখা যায়৷ কাহিনীৰ উপস্থাপন অতি সাৱলীল৷ চিনেমাট’গ্ৰাফীৰ ক্ষেত্ৰত ক’ব পাৰি যে কেমেৰাই যেন একো একোটা দৃশ্যৰ ছবি আঁকিছে৷ মাল্‌টা নদীখনে চিনেমাখনত গুৰুত্বপূৰ্ণ ভূমিকা লৈছে৷ স্নেহময় আৰু মিয়াগীৰ মাজত যোগাযোগৰ একমাত্ৰ মাধ্যম নদীখন (যদিও মাজে মাজে ট্ৰাংকক’লত কথা হয়)৷ বতৰৰ বাবে ফেৰীৰ চলাচল বন্ধ হোৱাত স্নেহময় আৰু মিয়াগীৰ মাজত যোগাযোগ বিচ্চিন্ন হৈ পৰে৷ মিয়াগী সুস্থ হৈ উঠাৰ কথা স্নেহময়ে গম নাপালে আৰু স্নেহময়ৰ অসুস্থতাৰ বিষয়ে মিয়াগী অৱগত নহ’ল৷ মিয়াগীৰ চিঠিলৈ বাট চাই পৃথিৱীৰ পৰা বিদায় ল’লে স্নেহময়ে৷

স্নেহময়ৰ চৰিত্ৰত অভিনয় কৰিছে ৰাহুল বসুৱে৷ মিয়াগীৰ চৰিত্ৰত জাপানৰ অভিনেত্ৰী চিগোচা টাকাকো চৰিত্ৰটোৰ লগত সুন্দৰকৈ খাপ খাই পৰিছে৷ স্নেহময়ৰ মাহীয়েকৰ চৰিত্ৰত মৌচুমী চেটাজ¹ৰ সাৱলীল অভিনয় আৰু বিধৱা মহিলা সন্ধ্যাৰ চৰিত্ৰত ৰাইমা সেনৰ সুন্দৰ অভিনয়ে দৰ্শকক আকৰ্ষিত কৰিছে৷ অভিনয়েও অধিবাস্তৱ যেন লগা কাহিনীটোৰ বাস্তৱতা মানি ল’বলৈ দৰ্শকক বাধ্য কৰিছে৷

এই লেখাটো প্ৰয়োজনীয় বুলি ভাবেনে?

তলৰ তাৰকাত ক্লিক কৰক !

গড় মাপকাঠী 3.8 / 5. ভোট : 42

Click to comment

Leave a Reply

Your email address will not be published. Required fields are marked *

To Top
error: Content is protected !!